Hindi nag-audition sa Trese! Boses ni Liza Soberano, umani ng papuri at pamimintas

Hati ang positive at negative reviews sa voice acting ni Liza Soberano sa Trese. May mga pumuri sa aktres at mayroon din namang pumintas.

Isa sa mga ipinupunto ng mga nakapanood ay ang monotonous daw na tono ni Liza at hindi rin nila nagustuhan ang pagta-Tagalog ni Liza dahil hindi raw nila maintindihan ang mga sinasabi nito.

May mga Pinoy pa ngang mas pinanood na lang ang Trese sa English / Japanese / Spanish audio para lang maintindihan at suportahan ang kauna-unahang Filipino Netflix Original anime series.

Kung marami ang hindi nagustuhan ang delivery ni Liza ng mga dialogue, mayroon ding mga nagsabi na Liza did a good job lalo na nga’t first timer siya sa voice acting.

Kinontra naman ito ng mga Tagalog-dubbed fanatics at supporters ng mga Pinoy voice actors.

Sabi nila na sana ay professional voice actress na lang daw ang pinili para mabigyan naman ng credit ang mga voice actor natin dito sa Pilipinas na talaga namang deserve din nila.

Aware naman ang manager ni Liza na si Ogie Diaz sa mga negative reactions at aniya ay ganu’n naman daw talaga, kung may natuwa ay mayroon din namang hindi.

Depensa niya kay Liza, “Kung may hindi nagkagusto sa boses ni Liza, eh opinyon nila ‘yun. Kung paanong may opinyon din naman ang iba. Kung nagandahan sila sa performance ng tinig ni Liza Soberano, eh di maraming salamat.

“Sa mga hindi, wala rin naman tayong magagawa. Opinyon n’yo ‘yun,” pahayag ni Ogie sa YouTube vlog nila ni Mama Loi.

Nilinaw rin ni Ogie na hindi raw nag-audition si Liza sa Trese dahil handpicked siya talaga ng production team at masaya raw ang Netflix sa performance ni Liza.

“Siya po ang first choice bilang Alexandra Trese. Marami pa kaming dinaanan bago natuloy ito. Kung alam mo lang.

“Pero naramdaman namin sa mga staff ng Netflix, ay grabe ang pagmamahal nila kay Liza. Sobra!

“Lahat sila natuwa sa aming Viber group, natuwa sila sa naging performance ni Liza at hindi raw sila nagkamali na kinuha nila si Liza Soberano,” ani Ogie.

Bagamat aminado si Ogie na mas marami pa ang deserving kaysa sa kaniyang alagang si Liza, binanatan naman niya ang mga nambabash sa aktres.

“Nabasa ko lang kasi sabi, mas marami pa raw deserving kaysa kay Liza. Ang problema kasi, hindi kayo taga-Netflix. Sana taga-Netflix kayo para kayo nag-decide.”

About Trese

Marami ang nag-aakala na ang ABS-CBN Corporation ang nag-produce ng Trese dahil na rin sa ilang eksena na pinakita ang logo na ABC-ZNN. Isa rin ang ABS-CBN sa nagpakita ng suporta nang pumayag silang palitan ang logo sa kanilang building para sa marketing strategy ng anime series.

Pero hindi ABS-CBN ang nag-produce nito kundi ang Jakarta/Singapore-based company na BASE Entertainment katuwang ang California-based na Lex and Otis at ang South Korean animation company na Tiger Animation. Ang Netflix naman ang exclusive distributor nito dahil kasama ito sa kanilang Netflix Original category.

May mga nagsasabi ring suportahan daw ang Trese dahil gawang Pinoy ito. Unfortunately, hindi naman talaga ito 100% gawang Pinoy dahil ang mga animators nito ay galing sa California, Singapore, Indonesia, at South Korea.

Gayunpaman, may ilang mga Pilipino pa rin naman ang kasama sa pagbuo nito.

Hindi rin naman magandang banatan ang mga “constructive criticisms” at sabihing suportahan na lang dahil gawang Pinoy. Paano naman mag-iimprove ang isang bagay kung puro papuri na lang ‘di ba? ‘Yung manonood ang mag-aadjust?

Mas okay sigurong sabihin na dahil hango ito sa isang Pinoy comic book series na tumatalakay sa Filipino folklores at dahil maganda naman talaga ang kuwento kahit may kaunting sablay sa dubbing.

Live-action series ang naunang plano para sa Trese pero mas minabuti na lang ng producers na gawin itong anime series.

Hango ito sa comic book series nina Budjette Tan at Kajo Baldisimo.

Leave a Reply

Your email address will not be published. Required fields are marked *